Орхон аймаг: Орон сууцны 1а хорооллын бүтээн байгуулалтад “Эрдэнэт үйлдвэр” ТӨҮГ 12.7 тэрбум төгрөг шийдвэрлэлээ

Орхон аймгийн ИТХ-ын дарга П.Пүрэвлхагва, Засаг дарга Д.Батлут, “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн нар “Орхон аймаг, “Эрдэнэт үйлдвэр” ТӨҮГ-ын 2020 оны хамтын ажиллагааны төлөвлөгөө” -нд гарын үсэг зурлаа. Уг төлөвлөгөө 22 заалттай бөгөөд үүнд 1А орон сууцны хорооллын барилгын ажлыг эхлүүлэх гэж тусчээ. Ингэснээр олон жил саатаад байсан тус хорооллын барилгын ажил эхлэхээр боллоо. 2013 онд барилгажилт нь эхэлсэн 1А орон сууцны хорооллын инженерийн шугам сүлжээ, дэд бүтцийг байгуулахад орон нутаг болон улсын төсвөөс хөрөнгө гаргах боломжгүйн улмаас долоон жил гацсан. Тэгвэл Орхон аймаг, “Эрдэнэт үйлдвэр” ТӨҮГ 2020 оны хамтын ажиллагааны төлөвлөгөөнд уг асуудлыг тусгаж Эрдэнэт үйлдвэрээс 12.7 тэрбум төгрөгийн хөрөнгө оруулалт хийхээр боллоо. Ингэснээр 1230 айл орон сууцтай болох боломж бүрдэж байна. Аймаг, орон нутгаас уг асуудлыг шийдвэрлэхийн тулд Монгол Улсын Ерөнхий сайдад ч хандаж байсан юм. “Орхон аймаг, “Эрдэнэт үйлдвэр” ТӨҮГ-ын 2020 оны хамтын ажиллагааны төлөвлөгөө” –нд туссан 22 заалт бүхий ажлыг хэрэгжүүлэхэд нийт хоёр тэрбум төгрөг зарцуулна. Үүний дийлэнхийг Цагаанчулуут багт барьж буй “Эрдэнэт” цэцэрлэгт хүрээлэнгийн бүтээн байгуулалтад зориулна. Орхон аймаг, “Эрдэнэт үйлдвэр” ТӨҮГ сүүлийн жилүүдэд хамтын ажиллагаагаа өргөжүүлсэний үр дүнд Хаягдлын аж ахуйгаас үүдэлтэй цагаан тоосны дэгдэлтийг багасгах зорилгоор “Цагаан тоос” дэд хөтөлбөрийг хэрэгжүүлж тоосны дэгдэлтийг 80 хувиар бууруулжээ. Мөн олон жил ярьсан усны алдагдлыг бууруулах чиглэлээр Ажлын хэсгийг хоёр тал хамтран байгуулаад байна. Өнгөрсөн оны гэрээг хоёр тал 96.4 хувьтай дүгнэсэн байна.