Хууль зүйн байнгын хороо өнөөдөр 13.00 цагт хуралдах товтой. Хуралдаанаар Хүний эрх, эрх чөлөөг хангахтай холбоотой зарим хуульд нэмэлт өөрчлөлт оруулах тухай хуулийн төсөл зэрэг асуудлыг хэлэлцэхээр байгаа юм.
Энэхүү хуралдаанаар АТГ-ын дарга, Улсын ерөнхий прокурорын бүрэн эрх дуусгавар болж байгаа асуудлыг хэлэлцэн, АТГ-ын дарга З.Дашдавааг улираан томилуулахаар тохирсон гэх мэдээлэл байна. Засгийн газрын өнөөдрийн хуралдаанаар Ерөнхий сайд Л.Оюун-Эрдэнэ АТГ-ын дарга З.Дашдавааг бүрэн эрхийнхээ хүрээнд улираан томилох шийдвэр гаргаснаа танилцуулж, сайд нарын дэмжлэг авчээ. З.Дашдаваагийн хувьд АТГ-ын даргаар 2019 оны тавдугаар сард томилогдсон бөгөөд түүний бүрэн эрхийн хугацаа энэ онд дуусаж байгаа бөгөөд Авлигын эсрэг хуулийн 21.4-д Авлигатай тэмцэх газрын дарга, дэд даргыг нэг удаа улируулан томилж болно хэмээн заасан байдаг.
