Нийслэлийн ногоон бүсэд намрын ойн хөнөөлт шавжийн тэмцлийн ажлыг үргэлжлүүлэн гүйцэтгэнэ.
Нийслэлийн Байгаль орчны газраас нийслэлийн ногоон бүсэд ойн хөнөөлт шавж, өвчний тархалтын судалгааг 2023, 2024 онд ойн мэргэжлийн байгууллагатай хамтран гүйцэтгэхэд ойн хөнөөлт шавж болох Сибирийн хүр эрвээхэй, Якобсоны төөлүүрч эрвээхэй, Шилмүүс хуйлагч тэмдэглэгдэн Сүхбаатар, Баянзүрх дүүргийн ойн санд голомт үүссэн нь тогтоогдсон.
Иймд шавжийн онцлогоос хамаарсан намрын тэмцлийн ажлыг авиа микробиологийн аргаар буюу онгоцоор 2024 оны наймдугаар сарын 31-ний өдрөөс эхлэн гүйцэтгэхээр төлөвлөөд байна.
Энэ ажлын хүрээнд Сүхбаатар дүүргийн 19, 20 дугаар хороо, Чингэлтэй дүүргийн 24 дүгээр хороо, Баянзүрх дүүргийн 35, дугаар хорооны Засаг дарга нарын “Хорио цээрийн дэглэм тогтоох тухай” захирамж гарган нийслэлийн ойг хомсдол доройтлоос хамгаалах ажлыг нөхцөлийг бүрдүүлээд байна.
2024 оны наймдугаар сарын 26-ны өдрөөс Экологийн цагдаагийн албатай хамтарсан төлөвлөгөөний дагуу дээрх хороодын нутаг дэвсгэрт ойн дагалт баялаг болох хуш модны самрыг болц гүйцээгүй үед нь түүж бэлтгэхээс урьдчилан сэргийлэх, таслан зогсоох, зөрчил үйлдсэн этгээдүүдэд хуульд заасан хариуцлага хүлээлгэх хяналт шалгалтын ажлын бүрэлдэхүүн хөнөөлт шавжийн тэмцлийн ажлыг зохион байгуулахтай холбогдуулан уулнаас иргэдийг буулгах, мэдээ мэдээллээр хангах ажлыг мөн гүйцэтгэж байгаа болно.
Тэмцлийн ажилд хэрэглэх бактерийн бэлдмэл нь зөвхөн тухайн шавждаа нөлөөлөх био бэлдмэл боловч ойд аялал зугаалгаар явах, байгалийн жимс, самар түүхийг 30 хоногийн хугацаанд хориглодог гэж Нийслэлийн Байгаль орчны газраас мэдээллээ.
