АНУ-ын Төлөөлөгчдийн танхимаас тус улсын иргэдийг ОХУ-аас шинээр гаргасан гадаад өрийг анхдагч болон хоёрдогч зах зээлээс худалдаж авах болон худалдахыг хориглосон батлан хамгаалахын төсвийн тодотголыг санал нэгтэй баталжээ. Энэ нь ОХУ АНУ-ын сонгуульд хөндлөнгөөс оролцсон гэх шалтгааны улмаас гаргасан шийдвэр аж.
Энэхүү нэмэлт өөрчлөлтийн дагуу ОХУ-ын Төв банк, Үндэсний халамжийн сан болон Холбооны төрийн сангаас 14 хоногоос дээш хугацаатай олгосон аливаа валютын өрт хориг тавих юм. Уг арга хэмжээний хүрээнд мөн АНУ-ын Үндэсний тагнуулын газрын даргад тус улсын Ерөнхийлөгчийн болон Конгрессын сонгуульд хөндлөнгөөс оролцсон байж болзошгүй хэргийн талаар Ерөнхийлөгч Жо Байденд тайлагнах үүрэг өгсөн байна. Үүний үр дүнд Ерөнхийлөгч Байден эдгээр хоригийг түдгэлзүүлэх эсвэл сунгах эсэхээ шийдэх ёстой билээ.
Тэгвэл АНУ-ын Худалдааны танхимаас энэхүү санаачилгыг аль хэдийн эсэргүүцсэн бөгөөд уг үйлдлийг улмаас тус улсын банкнууд Орост ажилладаг корпорацын үйлчлүүлэгчдэдээ үйлчлэх боломжийг хязгаарлана гэж үзэж байгаа юм. Мөн энэхүү нэмэлт өөрчлөлт нь ОХУ дэлхийн зах зээлээс хөрөнгө оруулалт олж авах чадварт зөвхөн бага зэрэг нөлөөлөх хэдий ч Америкийн компаниудын Орос дахь үйл ажиллагаанд ноцтой хохирол учруулна гэж мэдэгдсэн байна.
ОХУ-ын зүгээс АНУ-ын сонгуульд хөндлөнгөөс оролцсон гэх мэдээллийг удаа дараа няцаасан бөгөөд харин АНУ одоог хүртэл ямар ч нотлох баримт дэлгээгүй байгаа юм.
Сэтгэгдэл үлдээх