ОХУ-ын Ерөнхийлөгч Владимир Путин Украинд урт хугацааны дайн явуулахаар бэлдэж буй талаар АНУ-ын Тагнуулын ерөнхий газраас анхааруулжээ. ОХУ Украины зүүн хэсэгт ялалт байгуулсан ч мөргөлдөөнийг зогсоохгүй байх магадлалтай гэж АНУ-ын Тагнуулын алба үзэж байна. Украины нийслэл Киев хотыг эзлэх гэсэн оролдлого нь бүтэлгүйтсэний дараа Москва Донбассын бүсийг эзлэхээр цэргээ төвлөрүүлсэн. Гэсэн хэдий ч ОХУ-ын цэргийн хүчнүүд мухардалд орсон хэвээр байгаа тухай АНУ-ын Тагнуулын алба мөн онцолжээ. Үндэсний тагнуулын газрын дарга Аврил Хэйнс мягмар гарагт АНУ-ын Сенатын хорооны сонсгол дээр “Путин Донбасаас цааш зорилгодоо хүрэхийг зорьсон хэвээр байгаа ч түүний амбийц болон Оросын одоогийн цэргийн хүчин чадал хоёр зөрөөд байна" гэжээ. Түүнчлэн тэрбээр “Гэсэн хэдий ч дайн үргэлжилж байгаа тул Оросын Ерөнхийлөгч илүү хатуу арга хэмжээ авч магадгүй. Путин Орост оршихуйц аюул заналхийлж байна гэж үзвэл Москва цөмийн зэвсэг ашиглах болно” гэв. Батлан хамгаалахын тагнуулын газрын дарга Скотт Берриер мөн оросууд ч, украинчууд ч мухардмал ороод байна гэжээ. Хамгийн сүүлийн тулаанаар Киев Украин зүүн хойд Харьков мужийн дөрвөн сууринг эргүүлэн авсан байна. Украины Ерөнхийлөгч Владимир Зеленский “Дайн эхэлснээс хойш бөмбөгдөлтөд өртөж байсан Харьков хотоос Оросын цэргүүдийг аажмаар шахан гаргаж байна. Гэхдээ долоо хоног бүр, бүр өдөр бүр ялалт хүлээж байдаг уур амьсгалыг бий болгох ёсгүй" гэжээ.
Сэтгэгдэл үлдээх