Зургаан салбартай үйл ажиллагаа явуулж байсан “Чингис хаан банк” таван салбараа татан буулгаж одоо ганцхан төв нь л нэр төдий ажиллаж байна. 2019 оны 12-р сараас эхлэн үйл ажиллагаа нь доголдож, харилцагч, хадгаламж эзэмшигч нарынхаа гүйлгээг саатуулах, хойшлуулах зэргээр хохироосоор ирсэн “Чингис хаан банк”-ны хувьцааг “Ньюстандарт финанс” ХХК эзэмшдэг.
-Ц.БАЯРСАЙХАНЫ АРД Б.БАТХҮҮ БАЙДАГ-
“Ньюстандарт финанс” ХХК- ийн өмчлөгчид нь Монгол Улсын иргэн Д.Батаа, Ш.Бүтэд, Ц.Баярсайхан нар юм. Уг банкны 23%-ийг эзэмшдэг Ц.Баярсайханыг банкны хохирогчидийн гаргасан гомдол мэдээллийн дагуу АТГ шалгаж эхэлсэн. Түүний талаар мэдээлэл бараг байхгүйтэй адил боловч Ц.Баярсайханы нөхөр нь “Ану сервис” ХХК, “Мон дулаан трейд” ХХК, “FMX” ХХК-удын захирал гэгдэх МАН-ын бага хурлын гишүүн Б.Батхүү юм. Тэрбээр эхнэрийнхээ нэр дээр хувьцаа авсан “Чингис хаан банк”-ны далд эзэмшигчидийн нэг гэгддэг.
-Б.БАТХҮҮ 27 НАСТАЙ НУУЦ АМРАГАА ЗОДСОН-
Б.Батхүү 9-р сарын 03-ны өдөр Налайх дүүрэгт байрлах “Red Rock” амралтын газарт гэр бүлээс гадуурх харилцаатай 27 настай загвар өмсөгч С-ийг согтууруулах ундааны зүйл хэрэглэсэн үедээ зодож танхайрсан хэрэг нь цагдаагийн байгууллагын дуудлага мэдээлэлд бүртгэгджээ. Хэргийн газраас 12 кадр зураг, 12 см хар өнгийн хутга зэргийг нотлох баримтаар хураан авсан гэсэн мэдээлэл байна. Ямар ч байсан улс төр бизнесийн бүлэглэлийнхээ эрх ашгийн төлөө эхнэрээ зольж АТГ-т шалгуулж байгаа энэ эрхэм гэр бүлийн харилцааны хувьд тогтворгүй, зан төлөв нь хэрцгий нэгэн гэдэг нь дээрх баримтаас харагдахаар юм. Тэр ингэж нууц амрагаа хүртэл “гарын шүүс” болгосон нь хэд хэдэн хэвлэлээр гарчээ.
-МАН-ЫН ТОМЧУУДЫГ ХАУСААР ХАНГАДАГ ГЭЖ “ТОМОРДОГ”-
“Чингис хаан банк”-ны 2020 оны нэгдүгээр улирлын тайланг харвал нийт хөрөнгийн хэмжээ 372.1 тэрбум төгрөг байхад өр төлбөр нь 360.8 тэрбум төгрөгт хүрчихсэн байгааг харж болно. “Чингис хаан банк”-ны хохирогчдын өнөөгийн мэдүүлгээр уг банк нь харилцагч, хадгаламж эзэмшигч нарынхаа 11 тэрбум төгрөгийг гаргаж өгч чадахгүйд хүрч, мөнгөө авахаар нэхэмжилсэн хүмүүсийн мөнгийг мөнгөн гүйлгээгээр гаргаж өгөхгүй “боломжгүй...” гээд зах зээлийн үнэлгээнээс өндөр үнэтэй орон сууц “шахдаг” ч уг орон сууц бас л барьцаанд байсан гэв.
Б.Батхүү нь Зайсанд тансаг зэрэглэлийн хаус хороолол барьж, МАН-ын томчуудыг оруулсан хэдий ч зарсан байрнуудынхаа үл хөдлөх хөрөнгийн гэрчилгээг өөрийнхөө нэр дээр гаргуулан барьцаанд тавьсан гэсэн мэдээлэл ч байна. “Чингис хаан банк”-д мөнгөө алдаад байгаа хүмүүсийн дотор жирийн иргэнээс эхлээд алдартай тамирчид улс төр бизнесийн нөлөө бүхий томчууд ч байгаа. Үүнээс гадна уг банкинд “Эрүүл мэндийн даатгалын сан”-гийн 30 тэрбум төгрөг үрэгдэж, үүнтэй холбоотой авлига хээл хахуулийн хэрэг ч гарсан. “Чингис хаан банк”-д “Эрүүл мэндийн даатгалын сан”-гийн 30 тэрбум төгрөгнөөс гадна “Нийгмийн даатгалын сан”-гийн 100 гаруй тэрбум төгрөг гээд төрийн данстай 250 орчим тэрбум төгрөг байсан гэсэн мэдээлэл бий. Тэгвэл энэ их мөнгө хаачсан бэ?
ХАРИЛЦАГЧДЫН МӨНГӨӨР “СТЕП ГОЛД” КОМПАНИЙН ХУВЬЦААГ АВСАН УУ?
Банкны хувьцаа эзэмшигчид харилцагч хадгаламж эзэмшигчидийнхээ төдийгүй төрийн мөнгийг авч төрөл бүрийн бизнест хөрөнгө оруулж барилга байшин барьж, алт ухаж, хаус хороолол болгочихоод одоо дансандаа мөнгөгүй гээд харилцагчидийнхаа мөнгийг гаргаж өгөлгүй “луу унжиж” байна гэсэн хардлага төрүүлэхээр.
Б.Батхүү нь Канадын хөрөнгө оруулалттай “Стэп Голд” компанийн хувьцааг худалдан авсан байдаг. Тухайн компанид Монгол талаас хамгийн өндөр хувь буюу 16%-ийг эзэмшиж байна. “Стэп Голд” нь Дорнод аймагт Цагаан овооны алтны уурхайгаас алт олборлодог. 2018 онд нутгийн иргэдийг зодож цохисон, малын бэлчээрээс нь хөөж туусан, ИРГЭДИЙН НИЙТИЙН ХУРАЛ-ын протколыг хуурамчаар үйлдсэн гэх зэрэг хэл ам дагуулсан компани юм. “Стэп Голд” компанийн олон улсын бирж дээрх нэгж хувьцааны нэрлэсэн үнэ 50 цент байхад Б.Батхүү худалдан авч байсан. Одоо энэ компанийн хувьцааны үнэ 6 дахин өсчихсөн. Гэсэн ч банкны хадгаламж эзэмшигчидийн мөнгийг гаргаж өгдөггүй МАН-ын бага хурлын гишүүн, МАН-ын томчуудын хамгаалалтанд байдаг хэмээн аархдаг нэгэн. Энэ мэтээр “Чингис хаан банк”-д байршиж байсан иргэдийн хадгаламж, нийгмийн даатгал, эрүүл мэндийн даатгалын сангийн мөнгө гээд төр түмний олон тэрбум төгрөгийг салхинд хийсгэчихээд “...төлбөр түргэн гүйцэтгэх чадваргүй байгаа тул...” гэсэн албан бичгийг харилцагчиддаа шидэж суухад Монгол банк цээжээрээ хамгаалсаар л байх уу?
Сэтгэгдэл үлдээх