Коронавирус гар утас, мөнгөн дэвсгэрт дээр 28 хоног амьдрах чадвартайг тогтоожээ

Австралийн Үндэсний шинжлэх ухааны агентлагаас /CSIRO/ Covid-19-ийн вирус бэлэн мөнгөний дэвсгэрт болон гар утасны дэлгэц дээр 28 хүртэлх хоног амьдарч, халдвар тараах чадвартай болохыг тогтоосон байна.

 

Өмнөх лабораторийн туршилтаар SARS-Cov-2 вирус бэлэн мөнгө, шилэн гадаргуун дээр хоёроос гурван долоо хоногийн турш, хуванцар дээр зургаан долоо хоног хүртэлх хугацаанд амьдардаг гэдгийг тогтоосон байна.

Харин одоо CSIRO агентлаг коронавирус илүү удаан хугацаанд амьдрах чадвартай гэсэн дүгнэлтэд хүрчээ. Тасалгааны хэмд хуванцар гадаргуу, цаасан мөнгө болон ухаалаг утасны шилэн дэлгэц дээр дөрвөн долоо хоног хүртэлх хугацаанд амьдрах чадвартай гэж үзсэн байна.

“Хэр удаан хугацаанд амьдрах чадвартайг тодорхой болгосноор бид вирусийн тархалтыг зогсоож хүн амаа хамгаалахад илүү тустай байх болно” гэж CSIRO-гийн гүйцэтгэх захирал доктор Ларри Маршалл хэлжээ.

Австралийн эрдэмтэд туршилтаа харанхуйд хийсэн бөгөөд хэт ягаан туяа вирусийг устгаж байсан учраас гэрэлтэй орчинд илүү богино хугацаанд амьдрах чадвартай гэнэ. Томуугийн вирус яг ижил нөхцөлд 17 хүртэлх хоногийн хугацаанд амьдрах чадвартай байдаг аж.

Гэвч зарим мэргэжилтнүүд гадаргуу дээр үлдсэн вирус халдвар тараах бодит эрсдэл дагуулдаг гэдэгт эргэлзэж буйгаа илэрхийлжээ. Ихэвчлэн коронавирус найтаах, ханиах, ярих үед агаар дуслын замаар халддаг байна.

Сэтгэгдэл үлдээх