Ард түмний онц түр зөвлөл /АТОЗ/-өөс өнгөрсөн сарын 2-нд оффшор бүсэд данстай гишүүдийг шалган хариуцлага тооцох тухай тулган шаардах бичгийг УИХ-д хүргүүлсэн. Шаардах бичгийн хариуг Засгийн газар энэ сарын 15-ны өдөр өгөх ёстой байсан ч өгөөгүй учир ийнхүү жагсжээ. Мөн тэд Оффшор бүсэд нэг бүхий 49 хүний 17 тэрбум ам доллартай тэнцэх хэмжээний мөнгө байгаа бөгөөд улс төрчдийн хууль бус үйлдлийг УИХ-аас хууль батлан гаргуулах замаар хамгаалалт тавих гэж байгааг тус зөвлөлийнхөн буруушааж байгаа аж. Эл асуудлыг хэлэлцэхээр УИХ-ын онцгой чуулганыг хуралдуулах ёстой гэж үзэж байгаа юм. Жагсаалд ирсэн иргэдийн 80 орчим хувь нь 50-аас дээш насныхан байсан юм. Тус жагсаалыг дэмжсэн иргэд 21 аймгийн төв болон дэлхийн томоохон хотуудад жагсаж байгаа аж. Тухайлбал “Оффшорчдын эсрэг нэгдье” жагсаалыг дэмжигчид Унгар улсын Будапешт, Францын Канн, Бельги улсын Антверпен, Брюсель, Сөүлд Монголын элчин сайдын яамны гадаа жагсаж байна. Тэд “Оффшорд байгаа 17 тэрбум долларыг эх орондоо авчиръя”, “Оюу толгой, Ноён уул оффшорт байна” гэх мэт уриа лоозон барьсан байлаа. Жагсаалын үер МАХН-ын туг далбааг барьсан хүмүүс нэлээдгүй зогсож байгааг иргэд “МАХН-ын шоу болон хувирч байна” хэмээн дургүйцэж байсан юм. Харин жагсаалд Н.Энхбаяр ирэхэд “Бид Н.Энхбаярын шоуг хийгээгүй. Энэ жагсаалыг өөрийн PR болгож байна. Ард түмний сэтгэлээр тоглож ханахгүй байна уу?” гэж уурлах иргэд нэлээдгүй байсан юм. Белгийн вант улсад ч дэмжин идэвхтэй оролцлоо.   М.Мишээл