Монгол Улсын Засгийн газрын 2021 оны есдүгээр сарын 8-ны хуралдаанаар НЗДТГ, НИТХ, Улаанбаатар хотын Захирагчийн ажлын алба, түүний харьяа алба, агентлагуудыг энэ ондоо багтан Яармагт баригдсан Нийслэлийн төр, захиргааны шинэ байр руу нүүх үүргийг өгсөн билээ. Засгийн газраас өгсөн үүргийн дагуу нийслэлийн харьяа алба агентлагийнхан нүүж эхэлсэн. Тэгвэл өнөөдөр Засгийн газрын тэргүүн, Монгол Улсын Ерөнхий сайд Л.Оюун-Эрдэнэ болон түүний удирдлагын баг хамт олон, Хан-Уул дүүргээс сонгогдсон УИХ-ын гишүүд Яармаг дахь Нийслэлийн төр, захиргааны II байранд биечлэн очиж, үүрэг даалгаврын биелэлтээ шалгалаа. Одоогийн байдлаар нийслэлийн нутгийн захиргааны зургаан байгууллагын 400 гаруй албан хаагч нүүн суурьшаад байгаа юм.
2013 онд Улаанбаатар хотын ерөнхий төлөвлөгөөнд тодотгол хийж, нэг төвт хотоос олон төвт суурьшилтай хот болгон хөгжүүлэх, хот доторх төрийн захиргаа, банк санхүүгийн төвлөрлийг бууруулж, Яармагт шинэ төв байгуулахаар анх ярьсан. Тэрхүү төлөвлөгөөний дагуу Нийслэлийн төр, захиргааны II байрыг Яармагт 2018 оноос барьж эхэлсэн. Уг байр нь гурван блоктой бөгөөд А блокийг бүрэн ашиглалтад өгсөн бол Б блокийн гүйцэтгэл 70 хувьтай, гурав дахь блокийн ажил хараахан эхлээгүй байгаа юм.
Нисэх, Яармаг орчимд авто замын түгжрэл их, хотын захиргааныхан нүүж суурьшихаар түгжрэл улам нэмэгдэнэ гэсэн болгоомжлол нийтийн дунд бий. Тэгвэл Яармаг орчмын замын түгжрэлийн шалтгаан хийгээд түгжрэлийг бууруулах ажлын талаар Нийслэлийн Зам тээврийн асуудал хариуцсан төслүүдийн удирдагч Б.Одсүрэн танилцуулсан.
-Улаанбаатар хотын Чингэлтэй, Сүхбаатар, Баянгол дүүрэгт ажлын байр хамгийн олноор төвлөрсөн байдаг. Хан-Уул, Сонгинохайрхан дүүрэгт ажлын байрны тоо дээрх дүүргүүдээс хоёр дахин бага байдаг. Тиймээс хотын захиргаа Яармагт шилжиж ирснээр шинэ хотын төвийг хөгжүүлэх үндэс суурь болох юм. Яармагийн замын хөдөлгөөнд Өлзийт, Биокомбинатын иргэдээс гадна Өмнөговь, Дундговь аймгаас ирж буй иргэдийн “Нарантуул” зах руу чиглэсэн хөдөлгөөн нэмэр болдог нь судалгаанаас харагддаг. “Нарантуул” зах амардаг мягмар гарагт Яармаг орчмын замын хөдөлгөөн 10 орчим хувиар буурдаг. Мөн сургууль, цэцэрлэгийн хомсдолтой ч холбоотой. Нисэх, Яармагт аж төрж буй иргэд хүүхдүүдээ хотын төв руу зөөж сургаж байна. Тиймээс түгжрэлийг бууруулахын тулд 2022 онд Яармагийн замыг Энхтайваны өргөн чөлөөтэй холбох ажлыг эхлүүлнэ. Энэ хүрээнд Туул гол дээгүүр 400 метр гүүр, Энхтайваны өргөн чөлөө орчимд 240 метр гүүр, Дунд гол дээгүүр 90 метр гүүр барина. Улаанбаатар хотын хамгийн урт гүүрэн байгууламжтай 4.3 км авто замыг барьж байгуулах юм. Энэ зам баригдсанаар Яармаг орчмын түгжрэл 15-20 хувиар буурна. Түүнчлэн Мишээл орчим, Тэмээтэй хөшөө, Гэгээнтэн орчмын уулзварт дахин инженерчлэл хийж, нэвтрүүлэх чадварыг сайжруулна. Зайсангийн гүүрийг дөрвөн эгнээ болгох гэхчлэн бүтээн байгуулалтыг хийнэ гэсэн юм.
Эдгээр мэдээллийг сонссоны дараа Ерөнхий сайд Л.Оюун-Эрдэнэ “Монгол Улсын Засгийн газраас өгсөн үүрэг даалгаврыг цаг хугацаанд нь биелүүлсэн Нийслэлийн Засаг дарга бөгөөд Улаанбаатар хотын Захирагч Д.Сумъяабазар болон түүний баг хамт олонд талархал илэрхийлье. Олон жил ярьсан асуудлуудыг үе шаттайгаар шийдээд явах нь зүйтэй юм. 2022 он бол хэд хэдэн зүйлээр онцлог байх юм. Цар тахлын сорилт үргэлжилсээр байх хэдий ч улсын төсвөөс анх удаа 420 тэрбум төгрөгийг Улаанбаатар хотын түгжрэлийг цогцоор нь бууруулахад зориулна. Энэ бол 10 жилийн турш түгжрэлд зарцуулж байсан хөрөнгөтэй дүйцэж байгаа юм. Түүнчлэн Үндэсний хороо байгуулж, түгжрэл хэмээх том асуудлыг шийдэхэд анхаарал хандуулж байгаа нь ихээхэн дэмжлэг болж байна. Өчигдөр Шинэ сэргэлтийн бодлого батлагдаж, төрийн бодлого болсон. Тиймээс түгжрэл бууруулах ажилд он гаруут орох хэрэгтэй байна. Дээр нь Хөшигийн хөндийг чөлөөт бүс болгож, дэд бүтцийг байгуулна. Худалдаа, үйлчилгээний томоохон төвүүдийг Хөшигийн хөндий рүү үе шаттайгаар шилжүүлнэ. Тэр хэрээр Улаанбаатар хотын төвлөрөл саарч, түгжрэл буурах юм” хэмээн тодотголоо.
Өнөөдөр хуралдсан Засгийн газрын хуралдааны тэмдэглэлд нийслэлийн удирдлагууд Засгийн газраас өгсөн үүрэг даалгаврыг амжилттай хэрэгжүүлж байгааг онцлон тэмдэглэсэн бөгөөд тэмдэглэлийг хотын удирдлагуудад гардуулан өгсөн.
Нийслэлийн төр, захиргааны II байранд Ерөнхий сайд Л.Оюун-Эрдэнэ, түүний удирдлагын баг хамт олон, Хан-Уул дүүргээс сонгогдсон УИХ-ын гишүүд зочилж байгаад Нийслэлийн Засаг дарга бөгөөд Улаанбаатар хотын Захирагч Д.Сумъяабазар талархал илэрхийлээд “Нийслэл Улаанбаатар хотын 1.6 сая иргэнийхээ итгэлийг алдахгүй ажиллахаар бид хичээн ажиллаж байна. Улаанбаатар хотын түгжрэлийг бууруулахад 420 төгрөг зарцуулах шийдвэр гаргасан Ерөнхий сайдад талархаж байна. УИХ-д анх удаа Улаанбаатар хотын бодлогыг дэмжих Түр хороо байгуулсныг мөн дурдахад таатай байна. УИХ, Засгийн газар, нийслэлийн түвшинд нэгдмэл нэг байр суурин дээр байна гэдэг Улаанбаатар хотод тулгамдаж буй асуудлыг шийдэхэд ихээхэн дөхөм болох юм. Цаг хугацаа бол бүгдийн хэмжүүр байдаг. Хугацаандаа амжиж бүгдийг хийе. Бид зорьсондоо хүрнэ” хэмээн өгүүлсэн юм.
НЗДТГ-ЫН ХЭВЛЭЛ МЭДЭЭЛЭЛТЭЙ ХАРИЛЦАХ ХЭЛТЭС
Сэтгэгдэл үлдээх