Азийг дайрсан энэ жилийн хамгийн хүчтэй шуурга болох "Яги" хар салхи өнгөрсөн амралтын өдрүүдэд Вьетнамын хойд хэсэг, Хятадын Хайнань, Филиппинийг дайрсны улмаас олон арван хүний амь нас хохирсон байна.
Вьетнамын цаг уурын агентлаг сүүлийн хэдэн арван жилд тохиолдоогүй хүчтэй шуурга баруун зүг рүү шилжиж байгаа тул үер, хөрсний гулгалт үргэлжлэх эрсдэл байгааг анхааруулжээ. Яги Вьетнамын нийслэл Ханой хотын эрчим хүчний хангамж, харилцаа холбоог тасалдуулснаас гадна олон мянган мод унаж, байшингууд нуржээ. Засгийн газар шуурганы улмаас 8.5 сая хүн амтай Ханой хотод гурван хүн амиа алдсан гэж мэдэгдсэн бөгөөд энэ тоо нэмэгдэж магадгүй байна. Вьетнамд одоогийн байдлаар 21 хүн нас барсны дотор Ханой хотоос өмнө зүгт 100 км-ийн зайд орших Хоа Бинь мужид дөрвөн хүн хөрсний гулгалтаас болж амиа алдсан байна. Хойд нутгийн Хай Дуонг мужид 53 настай хүн мотоцикльтой явж байгаад модонд даруулж нас барсан тухай тус улсын хэвлэлүүд мэдээлжээ.
Арваад хүн сураггүй алга болоод буй эргийн Халонг хотын ойролцоох далайгаас нэг цогцос гаргаж авсан бөгөөд аврах ажиллагааг нөхцөл боломж бүрдсэн үед эхлүүлэх төлөвтэй байна. Хятадын өмнөд хэсэгт орших Хайнань арал дээр Яги дөрвөн хүний амийг авч одсон тухай орон нутгийн эрх баригчид мөн мэдээлжээ. Филиппин дэх иргэний хамгаалалтын албаны мэдээлснээр 20 хүн амиа алдаж, 22 хүн сураггүй алга болсон байна. Вьетнамын Цаг уурын байгууллагаас жижиг гол, горхины ойролцоо үер буух, хойд хэсгийн уулархаг нутаг болон далайн эргийн Тхань Хоа мужид эгц налуу газар нурах эрсдэл байгааг анхааруулжээ. “Шуурга хотыг сүйрүүлсэн. Гудамжинд явж байсан хүмүүс дээр мод унасан” гэж Ханой хотын оршин суугч 57 настай Хоанг Нгок Ниен ярьжээ. Вьетнамын хойд хэсэгт хамгийн их ачаалалтай байдаг Ханой хотын Ной Бай олон улсын нисэх онгоцны буудлыг бямба гарагийн өглөө хааж, ням гарагийн үдээс хойш дахин нээжээ. Хайнаньд урьдчилсан тооцоогоор эдийн засгийн их хэмжээний хохирол учирч, цахилгаан эрчим хүч их хэмжээгээр тасалдсан гэж төрийн мэдлийн Хайнань өдөр тутмын сонинд мэдээлжээ.
https://edition.cnn.com/2024/09/08/asia/typhoon-yagi-vietnam-china-philippines-intl/index.html
