Ерөнхийлөгчид нэр дэвшигчдийн эрүүл мэндийн үзлэгийн дүн гарлаа

Ерөнхийлөгчийн сонгуульд нэр дэвшихээ илэрхийлсэн гурван нэр дэвшигчид 23 төрлийн шинжилгээ, үзлэг хийжээ. Эрүүл мэндийн үзлэгээр нэр дэвшигчдийн суурь өвчлөлөөс гадна мэдрэл, сэтгэц, эрхтэн тогтолцоо зэрэг 23 нэр төрлийн шинжилгээ хийсэн байна. Ингэснээр Ерөнхийлөгчийн ажил, үүргийг гүйцэтгэхэд эрүүл мэндийн хувьд тэнцэх эсэхийг тогтоодог ажээ. Эрүүл мэндийн төрийн нарийн бичгийн дарга Д.Очирбат өнөөдөр 2017 оны Ерөнхийлөгчийн сонгуульд нэр дэвшихээ илэрхийлсэн гурван нэр дэвшигчийн Эрүүл мэндийн шинжилгээ, үзлэгийн дүнг өнөөдөр Сонгуулийн ерөнхий хороонд хүргүүллээ Эрүүл мэндийн төрийн нарийн бичгийн дарга Д.Очирбат “Шинжилгээний үр дүнг хуульд заасан хугацаанд Сонгуулийн ерөнхий хороонд хүргүүллээ. Гурван нэр дэвшигчийн шинжилгээ, үзлэгээр ямар нэг ноцтой зөрчил илрээгүй. Хуулийн дагуу нэр дэвшигчдийн эрүүл мэндийн мэдээллийг олон нийтэд зарлах хугацаа болоогүй учраас дэлгэрэнгүй мэдээлэл өгөх боломжгүй” гэлээ. Монгол Улсын Сонгуулийн тухай хуулийн 142-р зүйлийн 1.12 заалт, Ерөнхийлөгчийн сонгуулийн тухай хуулийн 23.3 заасны дагуу Эрүүл мэндийн сайдын 2017 оны дөрөвдүгээр сарын 26-ны өдрийн тушаалаар батлагдсан комисс ажиллаж 2017 оны тавдугаар сарын 7-ны өдөр Ерөнхийлөгчид нэр дэвшигч М.Энхболд, Х.Баттулга, Н.Энхбаяр нарын эрүүл мэндийн үзлэг, шинжилгээнд хамруулж, дүгнэлтээ гаргаж, хавсралтаар хүргүүллээ. Эрүүл мэндийн үзлэгийн Эрүүл мэндийн яамнаас гарсан комисс Улсын хоёрдугаар тусгай эмнэлэгт шинжилгээ, үзлэг хийсэн байна. Монгол Улсын Ерөнхийлөгчийн сонгуульд өрсөлдөх намууд тавдугаар сарын 11-ны дотор нэр дэвшигчийн бичиг, баримтыг Сонгуулийн ерөнхий хороонд хүргүүлнэ. Сонгуулийн ерөнхий хороо нэр дэвшигчийн талаар баримт, бичгийг нягталж, тавдугаар сарын 14-нд нэр дэвших эсэхийг нь шийдвэрлэж, тавдугаар сарын 17-ны өдөр нийтэд зарлана. Т.Цолмонсайхан