Британийн армийн ахмад дайчин Роберт Кларк “The Telegraph” сонинд саяхан нийтэлсэн нийтлэлдээ Их Британи болон Европын орнуудад анхааруулга өгчээ. 15 жил цэргийн алба хаасан Кларк "Их Британи дайнд бэлтгэх ёстой. Энэ удаад Америк биднийг аврахгүй" гэсэн гарчигтай нийтлэлдээ "Энхийн ногдол ашиг"-ын эрин үе дууссан гэжээ. АНУ-ын Ерөнхийлөгч асан Жорж Х.В. Буш, Их Британийн Ерөнхий сайд асан Маргарет Тэтчер нар ЗХУ задран унасны дараа энэ нэр томъёог хэрэглэж байжээ. Кларк нийтлэлдээ Орос Украинд ялалтад хүрсэн тохиолдолд Молдав эсвэл Гүржид довтлох боломжтой гэж тэмдэглэжээ. Тэндээс Орос Балтийн орнуудын эсрэг хөдлөх магадлал өндөр гэнэ. Роберт Кларк НАТО-гийн Цэргийн дарга Роб Бауэрийн саяхан хийсэн мэдэгдлийг онцолж, “НАТО-гийн гишүүн орнуудын энгийн иргэд ойрын 20 жилд Оростой дайтах төлөвт бэлэн байх ёстой” гэснийг тодогосон байна. Өнгөрсөн пүрэв гарагт НАТО сүүлийн 35 жил гаруйн хугацаанд хамгийн том цэргийн сургуулилтаа эхлүүлснээ зарласан.
Лондонд төвтэй иргэний асуудал эрхэлсэн судалгааны төвийн Батлан хамгаалах, аюулгүй байдлын албаны захирал Кларк Оросыг дахин зэвсэглэж, аж үйлдвэржүүлэх чадамжийг онцолж, энэ онд эдийн засгийн нийт бүтээгдэхүүнийхээ 30-40 хувийг цэрэг армидаа зориулна гэж амласан талаар мөн дурджээ. Барууны орнууд хариу арга хэмжээ авахад муу бэлтгэлтэй байгаа тул ирээдүйн мөргөлдөөнд бэлтгэхийн тулд эдийн засаг, нийгмээ дайчлахаар төлөвлөж эхлэх ёстой гэж тэрбээр “Newsweek” сэтгүүлд ярьжээ.
Их Британийн Батлан хамгаалахын сайд Грант Шаппс “Дэлхий улам аюултай болж байна” хэмээгээд 2024 оныг "эргэлтийн цэг" гэж хэлсэн. Их Британийн Засгийн газар батлан хамгаалах зардлаа дотоодын нийт бүтээгдэхүүний 2.5 хувьд хүргэхээр чармайж байна гэж Шаппс мэдэгдэв. Тэрбээр мөн бусад ардчилсан улс орнуудад цэргийн зардлаа нэмэгдүүлэхийг уриалав.
