"Ноён" долларын ханш сүүлийн жилүүдэд хэлбэлзэлгүйгээр өсөж, монгол төгрөг цаас болжээ. Тухайлбал, сүүлийн 30 жилд ам долларын ханш 70 дахин өсчээ. Үүнд,
- 2000 онд нэг ам.доллар- 1100-1150 төгрөг
- 2010 онд нэг ам.доллар- 1500-1600 төгрөг
- 2020 онд нэг ам.доллар- 2300-2400 төгрөг
- 2025 онд нэг ам.доллар- 3500 төгрөг болж байнга өсөлттэй явж иржээ.
Үүнийг дагаад импортын өсөлтийн дарамт голлон нөлөөлж байгаа нь инфляцыг хөөрөгдөх эрсдэл дагуулж байгааг эдийн засагчид хэлж, анхааруулсаар ирсэн. Эн тэргүүнд инфляц өсч, үнийн дарамтад иргэд өртөж, амьжиргааны түвшин буурна гэсэн үг. Цаашид Засгийн газрын хэрэгжүүлэхээр төлөвлөж буй мега төслүүдийн хүрээнд импорт нэмэгдэнэ. Үүнийг дагаад ам.долларын ханш өсөх магадлал өндөр гэдгийг эдийн засагчид хэлж байна. Өнөөдөр улсын хэмжээнд инфляц есөн хувьтай байгаа бол Улаанбаатар хотод 9.1 хувьтай байна.
Төгрөгийн эсрэг ам.доллар чангарахад суурь хүчин зүйлс нөлөөлөөгүй гэдгийг албаныхан хэлж байна. Учир нь, манай улсын төлбөрийн тэнцлийн гүйцэтгэлийг харвал, урсгал тэнцлийн алдагдал өмнөх оны мөн үетэй харьцуулахад 94 хувиар буурч 23.6 сая ам.долларт хүрчээ. Гадаад худалдаа оны эхний таван сарын байдлаар 1.02 сая ам.долларын ашигтай гарсан нь алдагдал буурахад нөлөөлсөн байна. Өөрөөр хэлбэл, чулуун нүүрсний экспорт 1.3 тэрбум ам.долларт хүрснээр гадаад худалдаа ашигтай гарсан аж.
