Өмнөд Солонгосын нисэх хүчин энэ сарын 9-нд дотооддоо үйлдвэрлэсэн тийрэлтэт хөдөлгүүртэй анхны сөнөөгч онгоцоо танилцуулав. Анх KF-X хөтөлбөр таван жилийн өмнөөс хэрэгжиж, үр дүнд нь ийнхүү Сөүл дотоодын сөнөөгч онгоцтой болж, батлан хамгаалахын чадвараа бэхжүүллээ.
"KF-21 Бурамэ" хэмээн нэрлэсэн тус хос тийрэлтэт хөдөлгүүртэй сөнөөгч онгоцыг Сөүлээс урагш 440 километрт орших Сачон хотод байрлалтай Өмнөд Солонгосын Агаарын үйлдвэрлэлийн удирдах байранд танилцуулжээ.
\
Онгоцны нээлтэд оролцсон Ерөнхийлөгч Мүн Жэ Ин индэр дээрээс “Бид эцэст нь өөрсдийн гэсэн дуунаас ч хурдан сөнөөгч онгоцтой боллоо. Бид батлан хамгаалахын салбарт шинэ эрин, шинэ түүх эхлүүлж байна” хэмээн ярьжээ.
Мүн Жэ Иний хэлсэнчлэн 2028 он гэхэд БНСУ-ын зэвсэглэлд KF-21 онгоц 40, 2032 он гэхэд 80 онгоц тус тус шинээр нэмэгдэх аж. KF-21 онгоцыг 4.5-р үеийн онгоц хэмээн дүгнэж байгаа аж. Өөрөөр хэлбэл, тус онгоц АНУ-ын "Lockheed Martin" үйлдвэрийн дөрөвдүгээр үеийн F-16 онгоцноос илүү боловсронгуй ч тавдугаар үеийн F-35 Lightning II онгоцноос удаан юм. БНСУ өдгөө Вьетнамын дайны үед бүтээгдсэн F-4E Phantom, F-5Е tiger сөнөөгч онгоцуудыг ашигладаг бөгөөд дээр дурьдсанчлан 2028 оноос дотоодын сөнөөгчөөрөө сольж эхлэх юм байна.
Сэтгэгдэл үлдээх